 |
|
Vieiros Canal Fwwwrando
desde 2002 |
|
|
|
|
|
A sección onde deixares as túas opinións, comentarios ou suxestións e debater con outros internautas.
|
|
|
|
| Mércores 07 de marzo do 2007. Actualizado ás 15:06 |
|
|
|
PROTESTAS DENDE O SECTOR EMPRESARIAL DO SOFTWARE LIBRE GALEGO
O Sergas defende o gasto de 650.000 euros en licenzas de Microsoft
[07/03/2007 15:06] O director de negocio de Igalia, unha das principais empresas galegas de software libre, acaba de publicar unha dura crítica contra a decisión do Sergas de seguir usando a tecnoloxía de Microsoft na súa web. Javier Vázquez argumenta que pagar máis de cen millóns das antigas pesetas por licencias que hai que renovar cada dous anos "significa gastar de forma ineficiente os nosos impostos". Pola súa banda, o Sergas defende que non ten outra alternativa que seguir traballando con Microsoft debido, entre outros factores, aos problemas técnicos que implicaría unha migración. Continuar 
ASOCIACIÓNS DE DEFENSA DAS LIBERDADES TACHAN A DECISIÓN DE ANTIDEMOCRÁTICA
Unha lei francesa pretende castigar os que difundan vídeos violentos sen ser xornalistas
[07/03/2007 12:12] O consello constitucional francés deulle o visto e prace á xa coñecida como Lei Sarkozy contra a delincuencia. Entre outras medidas restritivas, o texto prohibe que a xente que non sexa xornalista profesional difunda vídeos violentos na rede, cunha pena de até cinco anos de cadea. Continuar
O FBI CONSEGUIU ACCEDER AOS DATOS DO SEU DISCO DURO
Demanda a Microsoft porque o Internet Explorer non ocultou a súa afección ao porno
[06/03/2007 12:46] Un estadounidense demandou a empresa informática Microsoft porque o navegador que empregaba, Internet Explorer, non borrou información sobre as páxinas web pornográficas que visitaba, e que logo obtivo o FBI. Continuar
SEGUNDA XORNADA DE INFORMÁTICA GRÁFICA NA UDC
As ferramentas de software libre para o audiovisual danse a coñecer na Coruña
[06/03/2007 11:14] O grupo de programadores e usuarios de Linux GPUL achega por segundo ano o mundo da informática gráfica e o software libre ao público. Durante a mañá do martes 6 de marzo presentaranse no salón de graos da facultade de Informática da Coruña catro conferencias que darán a coñecer as ferramentas libres que existen para a creación de produtos audiovisuais, as súas vantaxes e o seu uso. Continuar
COLABORA CON FRANCIA E ITALIA COA ACHEGA DE DOUS MILLÓNS DE EUROS
Defensa desenvolve un sistema para espiar as comunicacións vía internet
[05/03/2007 16:24] O Ministerio de Defensa español traballa canda os de Francia e Italia na creación dun sistema informático, que permitirá espiar as comunicacións realizadas por calquera usuario na internet. Continuar
A ALTERNATIVA LIBRE AO EXPLORER SEGUE A CONQUISTAR ADEPTOS
Voluntarios completan a tradución do Firefox 2.0 ao galego en tres meses
[05/03/2007 14:11] Tres meses despois do seu lanzamento internacional, a versión 2.0 do navegador Firefox xa está dispoñíbel en galego. O máis relevante é que foi o esforzo de voluntarios, baixo o paraugas de Mancomun.org, o que permitiu a rápida tradución desta ferramenta, cada día máis popular entre os internautas. Na actualidade, en torno a un terzo dos usuarios empregan a principal alternativa libre ao Microsoft Explorer. Continuar
OS ACUSADOS SON APPLE, SAMSUNG E SANDISK
Mercan os dereitos sobre a patente dos reprodutores mp3 e denuncian os principais fabricantes
[04/03/2007 13:59] A empresa estadounidense Texas MP3 Technologies demandou a Apple, Samsung e Sandisk, principais fabricantes de reprodutores mp3 do mundo, por infrinxir a lei de patentes. Os denunciantes mercáronlle a dous coreanos hai pouco máis de dúas semanas un curioso rexistro de 1997 relacionado con este tipo de reprodutores. Continuar
PÓDESE LOITAR VIRTUALMENTE CONTRA UNHA VAGA DE LUMES
Nacións Unidas crea un videoxogo que ensina a prever os desastres naturais
[02/03/2007 18:03] Unha tsunami, un furacán, unha inundación, un terremoto e mesmo unha vaga de lumes. Son as catástrofes contra as que se ten que loitar no videoxogo Stop disasters!, creado pola Oficina para a Redución de Desastres das Nacións Unidas, ISDR. Continuar
A GALEGA R OBTÉN A MELLOR VALORACIÓN ENTRE AS OFERTAS MÁIS VELOCES
A OCU denuncia as diferenzas entre a publicidade da banda larga e as prestacións reais
[01/03/2007 17:32] "As velocidades actuais son suficientes para a maioría dos usuarios, pero as expectativas que crea a publicidade son tan altas que algúns poden sentirse decepcionados". Así avalía a Organización de Consumidores e Usuarios (OCU) as conexións de alta velocidade ofertadas no Estado. Telefónica e Orange logran os mellores resultados entre todas as ofertas de ata un mega por segundo. Entre os servizos de maior velocidade, a operadora galega é a triunfadora. Continuar
A FERRAMENTA LIBRE QUE XESTIONARÁ OS PRIMEIROS BANCOS DE TEMPO ESTÁ LISTA
Cidadáns de Foz e Allariz poderán intercambiar servizos en liña dende abril
[28/02/2007 16:47] Os dous primeiros bancos de tempo galegos comezarán a funcionar nos vindeiros meses, segundo anunciou hoxe a Xunta de Galicia. De feito, a ferramenta a través da que se xestionará o intercambio de servizos entre os veciños xa está lista e poderase descargar a partir de mañá. O goberno quere que sexan as mulleres rurais, un dos colectivos que máis sofren a fenda dixital, as primeiras en beneficiarse deste iniciativa. Nos bancos de tempo pódense ofrecer servizos -por exemplo, coidar nenos- e a cambio recibir horas. Os usuarios cambiarán estas horas por máis servizos, ofrecidos por outras persoas dadas de alta no banco de tempo. Continuar
O SERVIZO ATÓPASE EN FASE DE PROBAS E OFRECERÁ TRADUCIÓN AUTOMÁTICA
Bota a andar Páxinas.com, un buscador de información galega na rede
[28/02/2007 13:42] O buscador Páxinas.com xa se atopa en fase beta. Despois de case un ano de funcionamento do seu bot, que foi furando pola rede adiante na procura de contidos do noso país, xa está aberto ao público o servizo, aínda que, de momento, en período de probas. Continuar
MENTRES, DOUS AUTORES SEGUEN DENUNCIADOS NO SALNÉS
O Supremo dos EUA confirma que os blogueiros non son responsábeis dos comentarios
[27/02/2007 11:08] O Tribunal Supremo dos Estados Unidos reafirmou a inmunidade dos blogueiros fronte aos comentarios que se deixan nas súas bitácoras. O xulgado desestimou un recurso de apelación da compañía Universal Communication Systems, que demandara a Lycos por unhas mensaxes difamatorias aparecidas nun taboleiro de mensaxes. Continuar
OS ARQUIVOS DO NOVO PORTAL LEVARÁN O DRM DE MICROSOFT
Bittorrent venderá filmes e series na rede dende este luns
[26/02/2007 13:40] Bittorrent abre este luns o seu portal Bittorrent Entertainment Network, que permitirá a descarga legal de filmes e programas de televisión. A empresa consegue, así, reconciliarse coa industria cinematográfica estadounidense distribuíndo contidos de pago a prezos que oscilan entre os 2 dólares dos programas de televisión até os 4 dos filmes de estrea. Iso si, estes últimos só se ofrecerán na modalidade de alugueiro. Continuar
PRESIÓNS AOS FABRICANTES PARA QUE NON INSTALEN OS SEUS PROCESADORES
AMD acusa a Intel de tentar formar un monopolio mediante a coacción
[25/02/2007 12:13] A empresa fabricante de microchips AMD acaba de demandar a súa competencia, Intel, por estar a formar un monopolio aplicando técnicas de coacción mundial. Segundo informa Infochannel, a empresa californiana di que Intel presiona de forma ilegal os fabricantes de dispositivos para que non instalen nos equipos os seus procesadores. Trinta e oito foron as compañías que cederon ás presións de Intel, segundo AMD. O segundo fabricante mundial asegura que por este motivo os seus compoñentes foron eliminados dos pecés que se venden en grandes cadeas de tendas de electrodomésticos como Media Markt.
O PAPEL ESCURECE COA LUZ ULTRAVIOLETA
Inventan unha impresora que non precisa tinta
[23/02/2007 14:06] A empresa Xerox está a desenvolver unha nova tecnoloxía de impresión que non vai requirir o uso de tinta. A técnica, que aínda se atopa nas súas primeiras etapas, permitirá reducir os custos económicos e ambientais que provoca o uso masivo de papel nas oficinas, pois empregará follas reutilizábeis que se poderán imprimir e borrar ducias de veces. Continuar
FORMA PARTE DUN OBRADOIRO DE PRENSA DO CENTRO SOCIAL DE COIA
Editan en Vigo a primeira revista dixital feita por maiores
[23/02/2007 13:15] Un grupo de doce persoas maiores do centro social de Coia, en Vigo, estase a iniciar no mundo da prensa dixital a través dun obradoiro de xornalismo. Cada xoves publican no enderezo cscoia.com unha revista ou blog colectivo sobre temas de actualidade, cultura e mesmo consellos de beleza. É a primeira revista dixital do país feita por redactores tan veteranos, que teñen así un medio de expresión para as súas inquietudes.
CRÍTICAS Á ACTITUDE DO GOBERNO CENTRAL NO MANEXO DA CRISE
O blogomillo segue de preto o 'Ostedijk'
[22/02/2007 18:12] Os blogs do país amosan a súa preocupación pola situación do 'Ostedijk', cun seguimento moi de preto dos acontecementos e tamén críticas á actitude gobernamental. Brétemas, na súa entrada do 22 de febreiro, afirma que é o medo das autoridades o que está a condicionar a súa actuación; medo á alarma social e mediática e ás súas consecuencias nunhas eleccións que están moi próximas. Continuar
CRUZ VERMELLA É QUEN DE CONTROLAR OS MOVEMENTOS DOS ENFERMOS
O servizo de seguimento de persoas con alzheimer estará dispoñíbel este mes
[23/02/2007 10:07] Evitar que os enfermos de alzheimer se perdan será máis doado a partir da próxima semana. Daquela será cando Cruz Vermella lance en Galiza un servizo de localización de persoas con deterioro cognitivo a través da tecnoloxía móbil. O sistema é quen de avisar a un centro de control se, por exemplo, algún dos enfermos afástase demasiado do seu domicilio. Iso si, "o proxecto está pensado para pacientes nas primeiras fases desta enfermidade", matiza a responsábel do proxecto en Galiza. Continuar
O PRIMEIRO DO ESTADO EN DAR O PASO
O Concello de Zaragoza aforrará un millón de euros coa introdución do software libre
[23/02/2007 11:54] Impulso á innovación tecnolóxica, garantías de seguridade, mellor servizo e aforro de cartos. Neste último caso, até un millón de euros anualmente. Son os argumentos fundamentais expostos polo propio alcalde de Zaragoza ao tempo que anunciaba que o Concello optou por mudar ao software libre todas as aplicacións informáticas municipais. Continuar
EUA, XAPÓN E EUROPA ACAPARAN AS GANANCIAS POR LICENZAS NO MUNDO
O mapa da desigualdade no repartimento dos dereitos de autor
[22/02/2007 14:43] Capítulo 0, o blog de Manuel Gago, preséntanos dun xeito moi gráfico a desigualdade que existe no mundo no eido dos dereitos de autor e das licenzas. O mapa, un dos moitos incluídos na web Worldmapper.org, reflicte a supremacía dos Estados Unidos, Xapón e Europa fronte á práctica invisibilidade de Sudamérica, África e a meirande parte de Asia. Continuar
ABDELKARIM SULEIMÁN TAMÉN FOI CONDENADO POR DIFAMAR O PRESIDENTE
Condenan un blogueiro exipcio a catro anos de cadea por atentar contra o Islam
[22/02/2007 13:26] Un blogueiro exipcio foi condenado a catro anos de cadea polos contidos da súa bitácora. Segundo un tribunal de Alexandría, Abdelkarim Suleimán, de 22 anos, atentou contra a relixión e difamou o presidente da República. O autor, coñecido polo pseudónimo de Karim Amer, fora detido en novembro por oito entradas do seu blog. Continuar
PARA A PROTECCIÓN AO CONSUMIDOR
A UE vixiará as bitácoras que afagan empresas
[22/02/2007 11:36] A popularización dos blogs incluíu nos últimos tempos o descubrimento desta ferramenta por parte do ámbito empresarial. A bitácora como instrumento para ter un contacto máis estreito cos clientes é xa utilizada con relativo éxito. Ademais diso, están as empresas interesadas en que o debate na bloguesfera trate de xeito favorábel os sus produtos e servizos. Neste último caso, a Comisión Europea proponse vixiar os falsos blogs creados para afago de empresas concretas. Continuar
A REDE SOCIAL DE NOVAS PUBLICOU MÁIS DE 12.600 HISTORIAS DE 3.000 FONTES DIFERENTES
Chuza! cumpre un ano con máis de mil usuarios inscritos
[21/02/2007 12:11] Xa hai un ano que naceu Chuza!, a rede social galega de novas na internet. Pouco antes das once da noite do 20 de febreiro de 2006 abríase ao público o acceso a chuza.org. Daquela só contaba con nove usuarios rexistrados, outras tantas historias publicadas e quince pendentes. Continuar
O BLOGMILLO CONTRATACA INISTINDO NO "GOOGLEBOMBING" CONTRA A SGAE
A SGAE ameaza un blogueiro por asociar o nome da entidade co termo "ladrones" en Google
[21/02/2007 13:59] Julio Alonso, un blogueiro madrileño, acaba de recibir un fax da SGAE, que ameaza con demandalo. A razón é que Alonso participou co seu blog nunha campaña de 'googlebombing', un sinxelo método para asociar dous termos nos resultados de Google. Neste caso, a campaña logrou que cando se buscaba 'ladrones' en Google a primeira web que aparecía era a da SGAE. Continuar
FALA A WEBMASTER DA SANTA SÉ
Código aberto no Vaticano... de momento só nos computadores
[21/02/2007 12:10] "Non sabemos o sistema operativo que usa Deus, pero nós utilizamos Linux". Confésao a irmá Judith Zoebelein, a quen lle corresponde a dirección do equipo que xestiona a web do Vaticano. Outro exemplo de como as novas tecnoloxías estreitan contacto coa relixión, desde a recepción de avemarías vía correo electrónico até o envío de extractos bíblicos a través de mensaxes SMS. Continuar
ENTREVISTA CO PRESIDENTE DA ASOCIACIÓN DE ENXEÑEIROS DE INFORMÁTICA E XEFE DE INFORMÁTICA DO CONCELLO DE SANTIAGO
"Se a rede da zona vella é un éxito, o lóxico é levala a outras áreas"
[19/02/2007 17:55] Que unha web institucional requira da sinatura dun enxeñeiro informático, igual que unha ponte está avalada pola firma dun arquitecto. Este é un dos obxectivos da Asociación Enxeñeiros de Informática de Galicia (AEIG), que preside Jesús Rodríguez. Nesta entrevista, Rodríguez fai unha radiografía desta profesión nun intre clave, cando están a piques de nacer dous colexios profesionais de inscrición obrigatoria para os informáticos licenciados. Ademais de presidente da AEIG, Rodríguez é xefe dos servizos informáticos do Concello de Santiago. Por iso tamén adianta a posible expansión da rede sen fíos de Santiago máis alá do casco histórico. Continuar
AS PRAZAS ESGOTÁRONSE EN 33 SEGUNDOS NAS EDICIÓNS PASADAS DESTA PARTY
Milleiros de mozos e mozas, pendentes este sábado do ordenador para inscribirse no Xuventude Galiza Net
[17/02/2007 10:13] Este sábado 17 de febreiro ás 17 horas comeza o proceso de inscrición para obter unha praza no Xuventude Galiza Net 2007. O primeiro paso para participar nesta party é encher o formulario de preinscrición. O ano pasado as prazas esgotáronse en tan só 33 segundos. Os que consigan os seu obxectivo, os máis rápidos na tarde do sábado, gozarán do 30 de marzo ao 1 de abril de máis de sesenta horas ininterrompidas de videoxogos, cinema, torneos e cursos de formación. Aloxamento no Monte do Gozo e comida incluídas, e todo por 37 euros ou menos.
- Especial Xuventude Galiza Net 2006 en Vieiros
LIBERALIZACIÓN DO ESPECTRO RADIOELÉCTRICO
O Parlamento Europeo aposta pola universalización da banda larga no rural
[16/02/2007 11:13] "Acceso universal" á banda larga, especialmente nas zonas do rural. É un dos puntos que inclúe un informe aprobado este mércores no Parlamento Europeo. O texto propón fomentar a competencia e o desenvolvemento das tecnoloxías innovadoras no espectro radioeléctrico europeo. Segundo os eurodiputados, este espectro, que se liberará coa conversión ao sistema dixital, incrementará a dispoñibilidade xeneralizada da banda larga móbil ou sen fíos, "que beneficiará sobre todo ás zonas rurais". Continuar
O PROXECTO DIRIXIDO DENDE O CESGA ADVIRTE DA DUPLICACIÓN DE PROXECTOS PÚBLICOS
Un informe europeo alerta da "descoordinación" da e-administración galega
[16/02/2007 13:52] A administración electrónica no país avanza con falta de coordinación e duplicación de iniciativas. Así se recolle nun dos informes de ICHNOS, un programa da Unión Europea sobre a e-administración clausurado o xoves en Santiago. Este documento salienta a "falta de planificación" na administración electrónica e no apoio aos emprendedores en Galiza. É máis, o texto indica que existe "unha grave carencia de vontade política para favorecer os cambios". Técnicos do Centro de Supercomputación de Galicia (CESGA) dirixiron o programa coa axuda de socios italianos e checos. Continuar
EGANET TAMÉN PREMIARÁ A EMPRESAS, ADMINISTRACIÓNS E MESMO BLOGUEIROS
Búscase a mellor obra de arte multimedia galega
[15/02/2007 17:19] EGANET, a patronal das empresas de internet de Galiza, presentou hoxe a cuarta edición dos seus premios. Nas dez categorías destes galardóns inclúese por primeira vez o "Premio Net Art para a mellor web ou produto interactivo galego". Aínda que a maioría dos premios distinguirán iniciativas empresariais, existe un galardón, o "Premio Comunicación Web", ao que se poden presentar, por exemplo, blogueiros ou redes sociais. Outra categoría premiará a accesibilidade dos sitios web, aspecto no que as administracións do país están mellorando, segundo indicou a directiva desta asociación hoxe en Santiago. Continuar
RECTIFICADO O COMUNICADO SOBRE A INTERVENCIÓN DE TOURIÑO NO PARLAMENTO
A Xunta matiza a súa interpretación optimista dos datos da fenda dixital
[14/02/2007 14:07] O presidente da Xunta presentou uns "datos positivos" sobre a evolución do uso das novas tecnoloxías o luns no Parlamento. No comunicado orixinal que resumía esta intervención, a Xunta aseguraba que "en acceso a internet, Galiza foi a comunidade con maior crecemento no ano 2006 (23%)". O certo é que Presidencia recoñeceulle a Vieiros que se trataba dun "erro", pois en realidade o dato referíase unicamente a empresas, polo que reeditou o comunicado orixinal colgado na web. É máis, varias das outras cifras presentadas inicialmente distorsionaban a realidade do uso das TIC no país. O certo é que Galiza non saíu da cola da clasificación de uso da Rede, aínda que si recortou a distancia respecto a media estatal. Continuar
SERVIZO OPERATIVO A FINAIS DE 2007
R entra no mercado da telefonía móbil
[12/02/2007 14:51] A rede da empresa Vodafone fornecerá a infraestrutura para a nova oferta de telefonía que proxecta a operadora galega R. Segundo as previsións presentadas este luns, os usuarios de teléfono móbil poderán contratar os servizos de R no último trimestre de 2007, con ofertas pensadas inicialmente para os clientes que a empresa xa ten no ámbito de internet, teléfono fixo e televisión.
PROXECTO DE LEI DE IMPULSO DA SOCIEDADE DA INFORMACIÓN
As novas tecnoloxías xa libran batallas a prol dos dereitos civís
[12/02/2007 14:18] Hoxe en día falar das innovacións tecnolóxicas non é falar de futuro, é falar de presente, máis ben dun presente que pasa moi rápido. En definitiva o futuro esta aquí, chegou, e as novas tecnoloxías renóvanse e quedan obsoletas en pouco tempo, esta vertixe de acontecementos somete a un constante proceso de cambio o xeito de relacionárense os seres humanos e esta é a verdadeira revolución. Artigo de Pedro Martínez, tenente fiscal de Madrid, na web da Asociación de Internautas. Continuar
A REEDICIÓN DO MÍTICO NAVEGADOR DOS 90 ESTARÁ BASEADA EN FIREFOX 2.0
Netscape tenta resucitar coa súa versión 9.0
[12/02/2007 13:58] O que fora o navegador de internet dominante nos anos 90, Netscape, tenta recuperar o terreo que lle comeu rapidamente o seu rival, o Internet Explorer de Microsoft, e, despois, o seu fillo de código aberto Mozilla Firefox. A empresa propietaria do programa, AOL, anunciou que nun par de meses estará dispoñíbel a versión 9.0 do programa. Continuar
O ORGANISMO QUE CONCEDE NOVOS DOMINIOS REUNIRASE O 26 DE MARZO
PuntoGal segue a recibir apoios de cara á conferencia do ICANN en Lisboa
[09/02/2007 11:35] O 26 de marzo comeza en Lisboa a 28ª conferencia internacional pública da ICANN, o organismo internacional sen ánimo de lucro que se encarga de conceder os nomes e números dos enderezos da internet. Na xuntanza de Portugal, o ICANN terá sobre a mesa as peticións de novos dominios, e ha decidir cando e como convocará os novos nomes. De cara a ese evento, a asociación PuntoGal segue a recabar o apoio dos internautas a prol da concesión do dominio que distinga a lingua e a cultura galegas. No momento de redactar esta información, eran xa 2.761 as sinaturas recollidas, a meirande parte delas de persoas particulares, aínda que tamén se sumaron á iniciativa asociacións, institucións e empresas, e non só de Galiza. Continuar
UN NOVO PORTAL DA XUNTA MOSTRA O ATRASO DA E-ADMINISTRACIÓN NA GALIZA INTERIOR
O 40% dos concellos lugueses e ourensáns aínda non teñen acceso de alta velocidade
[09/02/2007 11:45] En Galiza contratar unha conexión de banda larga non é unha utopía só para os habitantes do rural. Incluso oitenta e nove concellos do país, case o 29% do total, aínda non poden acceder a este servizo, básico para poder aproveitarse das novas tecnoloxías. Así o mostra o Galimap, unha aplicación presentada onte pola Xunta. Este novo sistema de información xeográfica permite comprobar a gravidade da fenda dixital que sofre Galiza, na que hai 58 municipios que non ofrecen aos veciños ningún local de acceso público á rede. Continuar
MALIA QUE A LEI OBRIGA ÁS ADMINISTRACIÓNS A GARANTIR QUE TODOS PODEN USAR OS SEUS PORTAIS
As webs de todas as deputacións galegas suspenden en accesibilidade
[09/02/2007 08:35] Dende 2006 a lei obriga a todas as administracións a facer os seus sitios web accesíbeis para persoas maiores e con discapacidade. Máis dun ano despois, ningunha deputación galega cumpre os requisitos mínimos de accesibilidade, segundo o Test de Accesibilidade Web (TAW), unha ferramenta financiada polo Ministerio de Industria. Polo contrario, a Xunta e os concellos de Santiago, Vigo, A Coruña e Ourense presenta resultados en principio aceptábeis. Continuar
A DECISIÓN DEPENDE DAS DISCOGRÁFICAS
Apple avoga por suprimir a protección DRM na música dixital
[07/02/2007 13:02] O presidente da empresa informática Apple, Steve Jobs, está a negociar coas principais empresas discográficas para que deixen de vender música na rede co sistema de protección DRM. Deste xeito, podería resolver as queixas que lle expuxeron varias asociacións de consumidores europeas, preocupadas polo feito de que as cancións mercadas na tenda en liña de Apple, iTunes, non fosen compatíbeis con calquera reprodutor de música. Continuar
CONSIDERA ILEGAL A INSTALACIÓN DE BECHOS ESPÍAS
Un tribunal alemán prohíbelle á policía fedellar en computador alleo
[07/02/2007 10:46] Aproveitando a actualidade da loita antiterrorista, a semellanza de iniciativas paralelas en Estados Unidos e no Reino Unido, o executivo alemán tamén preparaba plans para darlle maiores poderes ás autoridades policiais para a ciber-investigación. A sentenza dun tribunal de Kalsruhe abre un precedente importante na defensa da privacidade dos usuarios naquel país. Continuar
IGALIA, A XUNTA E AGNIX NUN DOS EVENTOS MÁIS IMPORTANTES DA INDUSTRIA DO SOFTWARE QUE COMEZA MAÑÁ EN ESTREMADURA
Relatores galegos na Conferencia Internacional de Software Libre
[06/02/2007 14:36] Algúns dos mellores programadores do mundo participan dende o mércores na Conferencia Internacional de Software Libre. A cita de Badaxoz tamén acudirán centos de empresas e administracións á caza da última solución para explotar a tecnoloxía sen limitar a liberdade dos usuarios. Entre os relatores destacan Richard Stallman, principal ideólogo do movemento, e Miguel de Icaza. Entre tanto gurú e executivo internacional, tamén hai sitio para a presenza galega. Así, Xavier Vázquez explicará a historia de oito alumnos da Facultade da Informática da Coruña que en cinco anos montaron unha compañía, Igalia, que xa factura máis dun millón de euros. Ademais, a Xunta exporá os seus plans para a e-administración e Roberto Brenlla, de AGNIX, análizará o futuro dos programas abertos. Continuar
ÉXITO DOS 'HELIONAUTAS'
O barco solar completa a travesía atlántica
[06/02/2007 12:38] Co único impulso da enerxía solar, o Sun 21 chegou hai poucos días á Martinica, semanas despois de saír da outra beira do Atlántico. Os promotores da expedición quixeron facer coincidir esa simbólica chegada a porto coa presentación en París do informe sobre o cambio climático. Continuar
OS BLOGUEIROS REUNIRANSE ESTE MES NUNHA CAFETARÍA DA CIDADE DO LÉREZ
Segundo encontro de cervexas e blogs en Pontevedra
[06/02/2007 12:21] Un Beers&Blogs (cervexas e blogs) é unha reunión informal de blogueiros, que se xuntan nun local hostaleiro para compartiren en persoa experiencias e ideas mentres toman unhas cervexas (ou calquera outra cousa). Na wiki de B&B é doado de comprobar que Galiza ocupa un lugar destacado dentro do Estado na convocatoria deste tipo de eventos. A próxima cita será este mes en Pontevedra. Aínda non hai data definitiva: pode ser o 16 ou o 23 de febreiro, segundo se informa no blog convocante, Atún tun tun, onde os interesados se poden apuntar. Continuar
AS COMUNICACIÓNS ELECTRÓNICAS DA XUSTIZA PODERÍAN SER MÁIS VULNERABEIS
Windows e Explorer serán "requisitos" para os xulgados galegos
[06/02/2007 10:33] "Sistema Operativo Windows 98/X9/2000" e "navegador internet explorer 5.5 compatíbel ou superior". Estes son dous dos "requirimentos" que teñen que cumprir os xulgados galegos para introducir o sistema LexNet, unha nova ferramenta de comunicación electrónica na xustiza. Así o indica un convenio firmado pola Xunta e o Estado que foi publicado o venres no BOE. Aínda que a Consellería de Presidencia argumenta que o sistema é quen de funcionar con programas libres, este acordo mostra a contradición entre o discurso oficial de promoción do software aberto e a practica cotiá, que, neste caso, pasa por confiar nas ferramentas de Microsoft. Continuar
LEMBRANZA DO 'XIS'
O día que os internautas puideron navegar en galego
[06/02/2007 10:32] "Estamos a día 3 de febreiro de 1999 e o ánimo dos internautas segue encrespado". Contábao Vieiros no especial titulado Infovía Plus, Telefónica e nós (os internautas). Eran tempos onde o ministro correspondente prometía que en pouco tempo habería tarifa plana para o ADSL a 5 mil pesetas mes, á parte, instalación, módem e fornecedor. Para afrouxar tensións, cando menos os internautas do país estreaban aquel mes a versión definitiva do navegador en galego, o Xis. Fora desenvolvido por un grupo de informáticos e filólogos que se xuntaran no Proxecto Xis para verquer ao galego o Communicator de Netscape, logo de que abrira o seu código fonte. Na actualidade pode usarse en galego o Firefox.
AS ADHESIÓNS A PROL DO DOMINIO XA PASAN DAS 2.500
Industria considera Puntogal un "obxectivo estratéxico"
[05/02/2007 17:43] O conselleiro de Innovación e Industria, Fernando Blanco, entrevistouse este xoves con membros da Asociación Puntogal. Blanco coincidiu cos promotores na importancia de conseguir un dominio propio na rede para a lingua e cultura do país, algo que considera un "obxectivo estratéxico". Mentres non paran de medrar os apoios a esta reivindicación. Máis de 2.500 persoas xa asinaron a prol do Puntogal.
A PROTESTA PRETENDE EVITAR A SUBA DAS TARIFAS DE TELEFONÍA
Martes 6 de febreiro: día sen móbil
[06/02/2007 14:38] Os usuarios de teléfonos celulares están chamados a participar este martes 6 de febreiro nunha xornada de móbiles caídos. A convocatoria, feita a través do correo electrónico, pretende darlles un toque de atención ás tres principais compañías de telefonía, Movistar, Vodafone e Orange, para que dean marcha atrás na súa decisión de subir as tarifas a partir do 1 de marzo. As empresas pensan así neutralizar a lei que as obriga a cobraren as chamadas por segundos. Xa anunciaron que incrementarán o prezo de estabelecemento de chamada e mais o custo medio por minuto, co que pensan manter os seus elevados beneficios. Continuar
SEGUNDO A EMPRESA WEBROOT, O SISTEMA TEN IMPORTANTES LIMITACIÓNS DE SEGURIDADE
O novo Windows Vista deixa pasar até un 84% do spyware habitual
[05/02/2007 14:07] Enxeñeiros da empresa Webroot, especializada no desenvolvemento de software de seguridade, publicaron a semana pasada un informe no que sinalan que Windows Vista non detecta a maioría do spyware e virus máis habituais. En concreto, falan dun 84% dos casos en que o novo sistema operativo de Microsoft é vulnerábel aos ataques de spyware, adware, monitores de sistema, virus, troianos e rastrexadores de teclado. Continuar
CORREO DO CO-PRESIDENTE DA COMPAÑÍA A BILL GATES
"Compraría un Mac hoxe mesmo se non fose porque traballo para Microsoft"
[04/02/2007 14:35] Decenas de correos electrónicos enviados entre directivos de Microsoft están a ser publicados por mor dun proceso xudicial. A empresa presidida por Bill Gates enfrontase nun xulgado de Iowa, Estados Unidos, á acusación de utilizar supostas tácticas empresariais ilegais. Entre os moitos mensaxes desclasificados até agora destaca o que Jim Allchin, co-presidente da multinacional, lle manda a Bill Gates no que asegura que compraría un Mac "hoxe mesmo se non fose porque traballo para Microsoft". Continuar
CONVOCADO O QUINTO PREMIO DE XORNALISMO CIENTÍFICO
Divulgar o coñecemento tecnolóxico ten recompensa
[02/02/2007 14:58] A Consellería de Innovación e Industria, a través da Dirección Xeral de Investigación, Desenvolvemento e Innovación, convocou unha nova edición do Premio de xornalismo científico Galicia innovación. O certame ten como finalidade estimular a produción de textos xornalísticos especializados en materia científica, en investigación e desenvolvemento. A convocatoria encádrase dentro do conxunto de actividades coas que a dirección tenta divulgar a comprensión do que significa o desenvolvemento científico e tecnolóxico na configuración do mundo contemporáneo. Na edición do 2006 o xornalista de Vieiros Roberto Noguerol recibiu, de xeito ex aequo xunto con Raúl Romar de La Voz de Galicia, o primeiro premio pola súa reportaxe sobre a evolución do software libre.
- Vieiros faise co Premio de Xornalismo Científico Galiza Innovación
ENTREVISTA CO DIRECTOR DE BLUSENS, LÍDER NA VENDA DE REPRODUTORES MP3
"Coa formación que temos, hai que pensar en ser empresario e non funcionario"
[02/02/2007 08:30] Agora mesmo é un dos homes de moda, a cara do éxito do mundo dos negocios en Galiza. Contrata misses e patrocina equipos no mundial de motos para promocionar os seus trebellos dixitais. É certo que Xosé Ramón García, santiagués de só 36 anos, sabe como atraer os focos dos medios cara aos seus negocios. Pero tamén é verdade que o avala un espectacular currículo e, sobre todo, as cifras de negocio de Blusens. Son xa medio millón de reprodutores mp3 vendidos no estado, o que o convirte no líder deste mercado. A compañía ten filiais en Dubai, China, Malasia e uns 300 obreiros en Hong Kong. Todo isto deseñado dende Galiza "sen ningún complexo". Continuar
AS PRAZAS ESGOTÁRONSE EN 33 SEGUNDOS NAS EDICIÓNS PASADAS DESTA PARTY
Só os máis rápidos co rato lograrán un sitio en Xuventude Galiza Net
[01/02/2007 10:37] 17:00 horas do 17 de febreiro. Esa é a cita que milleiros de mozos do país xa anotaron nas súas axendas. A esa hora, a organización de Xuventude Galiza Net porá na rede o formulario para lograr unha praza na "party" máis popular de Galiza. E hai razóns abondo para non esquecer esta data, pois "as prazas para este evento cubríronse en menos de 33 segundos nas últimas edicións organizadas en 2005 e 2006", lembra a organización. Así os máis rápidos no envío do formulario gozarán de máis de sesenta horas ininterrompidas de videoxogos, cinema, torneos e cursos de formación. Aloxamento no Monte do Gozo e comida incluídas, e todo por 37 euros ou menos. Continuar
O 'HIDROMETANO' FÓRMASE A PARTIR DA DESCOMPOSICIÓN DO PLANCTO
A enerxía alternativa podería estar no fondo do mar
[01/02/2007 11:05] Científicos alemáns e doutros países están a traballar intensamente cunha nova fonte de enerxía alternativa no fondo do océano. O metano no mar fórmase a partir da descomposición do plancto. Cando este morre descende ás profundidades, onde o frío e a presión fan que se agrupe en moléculas acuosas coñecidas como hidrato de metano. Científicos xaponeses calculan que o hidrometano acumulado nas augas do seu arquipélago podería ser suficiente para o abastecemento de enerxía do país durante cen anos. Porén, o sistema de manipulación conta cunha serie de dificultades para o seu pleno desenvolvemento. Poden aumentar a información no Deutsche Welle.
SANIDADE, INDUSTRIA, PRESIDENCIA E ECONOMÍA PRESENTAN O FUTURO DA E-ADMINISTRACIÓN GALEGA
A Xunta quere empregar os telediagnósticos para reducir as listas de espera
[31/01/2007 14:39] Pagar os impostos por internet con tarxeta ou reducir as listas de espera nos hospitais mediante consultas en liña. Estes son algún dos proxectos prioritarios para a administración electrónica da Xunta, iniciativas presentadas por representantes das consellerías de Industria, Sanidade, Economía e Presidencia nunha xornada celebrada esta mañá en Santiago. Fomentar o uso do software libre "tanto nos servidores como nos computadores dos funcionarios" é outra das medidas adiantadas para sacar a Galiza da "cola do estado que está a cola da Unión Europea no uso das TIC" . Continuar
MARISOL LÓPEZ REUNIUSE ESTE MÉRCORES COA ASOCIACIÓN
Política Lingüística mostra o seu apoio a PuntoGal
[31/01/2007 13:57] A secretaria xeral de Política Lingüística, Marisol López, recibiu este mércores en Compostela os membros da Xunta Directiva da Asociación PuntoGal, que promove a existencia dun dominio en Internet para a lingua e a cultura de Galiza. Marisol López manifestoulles o "pleno apoio" do seu departamento aos obxectivos que persegue a asociación. "A existencia deste dominio servirá para darlle maior visibilidade na Internet á existencia da nosa lingua e da nosa cultura; por iso, alentamos esta iniciativa promovida por unha importante representación do ámbito cultural e social do noso país", afirmou.
- Case 1.800 persoas xa asinaron a prol do PuntoGal
EN SÓ DÚAS SEMANAS DE CAMPAÑA
Case 2.000 persoas xa asinaron a prol do PuntoGal
[31/01/2007 11:01] Preto de 2.000 persoas amosaron xa o seu apoio individual á consecución do dominio propio para a lingua e a cultura galegas, promovido pola asociación PuntoGal. Dende que se abriu a convocatoria na súa páxina web o pasado 17 de xaneiro, xa asinaron a favor do dominio centos de persoas, ademais dalgúns colectivos, empresas e institucións. O ritmo de chegada de sinaturas é constante. Continuar
O XIGANTE DA AUTOMOCIÓN PASA A LINUX
Citröen cambia ao software libre
[31/01/2007 12:31] Serán arredor de 20 mil computadores e máis de dous milleiros de fornecedores os que pasarán a ter instalado o sistema operativo Linux nas instalacións do xigante europeo do motor PSA Peugeot Citröen. Un significativo movemento en favor do código aberto que coinciden ademais coa presentación do Windows Vista de Microsoft. Os expertos prognostican o avance das alternativas ao Windows entre as grandes empresas, explicado pola redución de custos que conseguen coa introdución de Linux. Poden ampliar en Linux Electrons e Auto Spectator.
O PAÍS ASIÁTICO AÍNDA NON CONTA CON APARATOS DE 3X
A cuarta xeración de telefonía móbil xa esta aquí... en China
[31/01/2007 10:31] China levou a cabo en Xangai os primeiros ensaios do mundo con tecnoloxía móbil de cuarta xeración (4X), completamente desenvolvida por investigadores do país, segundo informaba o pasado martes a prensa local. A nova tecnoloxía transmite datos até cincuenta veces máis rápido que a 3X, a máis recente nos mercados mundiais, que paradoxalmente aínda non funciona en China por repetidos atrasos do goberno asiático na concesión de licenzas. Continuar
PODERASE DESCARGAR NAS PRÓXIMAS SEMANAS
A Xunta xa traduciu o Windows Vista ao galego
[30/01/2007 12:53] Haberá Windows Vista en galego e será "en breve". Política Lingüística confirmou a Vieiros que un equipo de tradutores da Xunta e da Real Academia Galega (RAG) xa rematou a tradución do novo sistema operativo. A Xunta, que oficialmente apoia o software libre, adica así recursos públicos a expandir o mercado do sistema propiedade do xigante Microsoft. Tamén é certo que, con este investimento, a Xunta pon a disposición a versión en galego dunha ferramenta que pode dominar o mercado nos próximos anos. Continuar
LANZAMENTO OFICIAL DO WINDOWS VISTA
O novo sistema operativo de Microsoft chega rodeado de polémica
[30/01/2007 11:40] O martes 30 sae á venda para os usuarios domésticos a nova versión do sistema operativo de Microsoft, Windows Vista, cinco anos despois do lanzamento do XP. A empresa norteamericana domina na actualidade o mercado do software, pois ten instalada algunha das versións do seu Windows no 95 por cento dos computadores do mundo, e aspira a que os usuarios se actualicen ao Vista. Microsoft asegura que o novo sistema é máis seguro, máis avanzado e máis atractivo visualmente, pero os seus detractores non están de acordo, e mesmo afirman que podería ser ilegal en Europa. Continuar
REDES PÚBLICAS E UNIVERSAIS CONTRA A FENDA DIXITAL
Todas as aldeas da Estrada terán dende esta semana conexión por banda larga
[29/01/2007 17:23] Acceder a internet de alta velocidade dende calquera aldea da Estrada será posible a partir do martes. Así o adiantou hoxe a iniciativa A Estrada Dixital. Deste xeito, o municipio de Tabeirós convértese no segundo concello da Galiza rural que loita contra a fenda tecnolóxica cunha rede sen fíos de titularidade pública. E iso que o director xeral estatal para a Sociedade da Información é contrario ás redes públicas porque, asegura, prexudican ás operadoras privadas. Continuar
GALIZA FOI PIONEIRA
Os suecos van ter embaixada en Second Life
[30/01/2007 11:01] Suecia vaise converter no segundo país do mundo -Galiza ten unha de seu- con embaixada en Second Life. A iniciativa parte do Instituto Sueco, directamente vencellado ao Ministerio de Asuntos Exteriores. O seu director, Olle Waestberg, salientou que coa embaixada virtual poderán chegar a un amplo sector da mocidade, ademais de ofrecer información e promocionar Suecia. No entanto, non expenderán pasaportes e visados como un organismo oficial, mais diranlles aos usuarios como conseguilos na vida real. Por outra banda, hai quen xa anda a reclamar que antes dunha segunda vida habería que ter unha primeira.
- Unha tapa de polbo en Second Life?
- A Universidade de Vigo abre unha oficina en Second Life
CARTA DO RESPONSÁBEL DE POLÍTICA LINGÜÍSTICA PARA A MULTINACIONAL AMERICANA
A Generalitat reclámalle a Apple que inclúa o catalán no seu novo sistema operativo
[29/01/2007 13:51] O novo sistema operativo Mac OS Leopard así como todos os produtos fabricados por Apple poderían incluír nun futuro o catalán entre os seus idiomas. Polo menos esa é a intención de Miquel Pueyo, secretario de Política Lingüística da Generalitat de Cataluña que lle mandou con tal fin unha carta aos responsábeis americanos e europeos da compañía Apple. Pueyo insiste na misiva na necesidade de incluír o catalán en todos os produtos de Apple, en especial no sistema operativo que comezará a distribuírse no próximo verán. Ademais reclama que as versións dos produtos da compañía que comercializa o iPod e o Mac estean dispoñíbeis en igualdade de condicións co resto das quince linguas que ofrecen actualmente no cedé do ‘Mac OS’. Miquel Pueyo tamén lle recorda a Apple as mobilizacións que se produciron nos últimos anos por parte dos usuarios de Mac para conseguir que o catalán sexa unha opción do sistema operativo.
ESTREARASE NOS ESTADOS UNIDOS O 5 DE FEBREIRO
Yahoo! tentará competir con Google pola publicidade en internet co seu sistema Panamá
[29/01/2007 11:53] A cómoda vantaxe coa que o xigante Google lidera o campo da publicidade en internet pode perigar desde o próximo 5 de febreiro, data na que Yahoo! lanza Panamá, o seu sistema de insercións publicitarias. A entrada dun novo competidor no negocio está a espertar unha grande expectación na rede, de feito na empresa norteamericana aseguran que é "a noticia máis importante desde hai moito tempo". Malia isto, o interese dos expertos e analistas vai máis aló do propio sistema publicitario xa que vén nel a última esperanza de Yahoo! para remontar posicións ante os seus competidores e recuperar usuarios. Non hai que esquecer que en novembro pasado filtrouse un documento interno da empresa no que se recoñecía que non estaba definido o público obxectivo, as xerarquías internas nin a estratexia de Yahoo!.
ANUNCIOUNO UN DOS SEUS FUNDADORES NO FORO ECONÓMICO MUNDIAL
Youtube compartirá beneficios cos usuarios que suban vídeos
[28/01/2007 12:22] Chad Hurley, un dos fundadores de YouTube, anunciou este sábado que a páxina compartirá os seus beneficios financeiros cos seus millóns de usuarios. Segundo adiantou Hurley no Foro Económico Mundial que se está a desenvolver en Davos, unha das maiores innovacións en que traballa a web é o xeito de permitir que o usuarios cobren polo contido subido. "Temos unha audiencia suficientemente grande para ter a oportunidade de apoiar a creatividade mediante o repartimento de beneficios cos usuarios", asegurou o fundador da famosa páxina. Porén, Hurley, multimillonario grazas á venda de Youtube a Google (1.278 millóns de euros), aínda non deu detalles sobre o importe que recibirán os usuarios.
RECLAMABAN 5.000 EUROS POLA MÚSICA DAS CELEBRACiÓNS DE CEDEIRA
A Xustiza libra a unha comisión de festas de pagarlle os dereitos á SGAE
[26/01/2007 14:36] A Audiencia Provincial da Coruña fallou en contra da Sociedade Xeral de Autores e Editores, SGAE no preito polas festas de Cedeira en 2003. O xulgado de primeira instancia condenara á Comisión de Festas local a pagar 5.000 euros pola dereitos da música. Porén, a Xustiza di agora que a Comisión «carece de capacidade para ser parte» no conflicto, polo que non pagará un peso. Malia todo, a xurisprudencia sobre se as comisións e os concellos teñen que pagar á SGAE polas festas segue a ser confusa. Continuar
DESENVOLVEN A POLÉMICA TECNOLOXÍA RFID NO PORRIÑO
Microchips galegos para controlar os asistentes dos cumios internacionais
[26/01/2007 14:31] Chámase RFIDELIA e é a primeira empresa galega de sistemas RFID, a polémica -e eficaz- tecnoloxía chamada a remprazar os códigos de barras. Os RFID son chamados chips espía polos seus detractores, dada a súa capacidade de invadir a intimidade dos cidadáns. As ferramentas desta compañía aplicáronse xa en citas tan importantes coma os Premios Príncipe de Asturias ou en cumios en Washington. Dende a sede da empresa no Porriño explican que "ningunha tecnoloxía de por si é boa ou mala, todo depende do uso que lle queiras dar". Continuar
A FOTOBLOGOTECA INCORPORA AS IMAXES SUBIDAS POLOS USUARIOS AOS SEUS BLOGS
Abertal presenta un sistema propio de xestión de fotoblogs
[26/01/2007 11:29] A empresa carballesa Abertal Networks incorpora ao seu servizo de xestión de blogs blogoteca.com a posibilidade de engadir galerías fotográficas e mesmo crear fotoblogs. As imaxes que se suban ás bitácoras persoais aparecerán automaticamente no enderezo fotoblogoteca.com, onde se poderán compartir e consultar. Continuar
ERGAC.ORG REÚNE A INFORMACIÓN OFICIAL E O BLOG DA ASOCIACIÓN
Os espazos radiofónicos galegos en Cataluña contan cunha nova web
[26/01/2007 11:03] A asociación Espazos Radiofónicos Galegos en Catalunya (ERGAC) ten unha nova web na que se integran a parte institucional e o blog, que anteriormente estaba aloxado no servizo Blogger. A comunidade galega en Cataluña dispón, deste xeito, dun novo espazo de encontro e comunicación na rede, complementario aos cinco programas que se emiten actualmente noutras tantas emisoras locais catalás. Continuar
O CAMIÑO CARA O REXISTRO CIVIL EN LIÑA
Presidencia e Red.es financian a informatización dos xulgados de paz e rexistros civís
[26/01/2007 10:15] A Xunta vai destinar 686.000 euros á informatización dos rexistros civís e xulgados de paz de Galiza. A sinatura do convenio entre a Consellería de Presidencia e a entidade do Ministerio de Industria Red.es para o desenvolvemento do programa Rexistro Civil en Liña, incluído no Plan Avanza, foi aprobada o xoves no Consello da Xunta. Será o xermolo da integración das TIC nestes ámbitos, e o camiño para unha xestión rexistral tecnoloxicamente avanzada que permita a prestación dun servizo de maior calidade. Continuar
OS INTERNAUTAS XA PODEN ADHERIRSE INDIVIDUALMENTE Á CAMPAÑA
As sinaturas en apoio do Puntogal achéganse xa ao milleiro en só tres días
[25/01/2007 19:45] En apenas tres días desde que se abriu o espazo na web da Asociación PuntoGal, os apoios non paran de chegar. Nestes momentos xa pasan de 900 os internautas que asinaron en favor dun dominio para a lingua e cultura galega na rede e a cifra non para de medrar. Os promotores son optimistas diante do interese en loitar pola reivindicación da identidade da nosa cultura na internet. O Puntocat levara á ICANN o aval de 50 mil sinaturas. Agora nós iniciamos o camiño. Asina xa para que o desafío se resolva con éxito para Galiza!
- A Asociación PuntoGal presentouse na Real Academia
- A polo Galiza.gal: comeza a conquista do dominio
TELEFÓNICA PROMETE ADIANTAR UN ANO A EXTENSIÓN DA BANDA LARGA AO RURAL
Nas aldeas seguirase a pagar máis por menos velocidade en internet
[25/01/2007 16:59] Rematar o Programa de Extensión da Banda Larga a Zonas Rurais este ano e non en 2008. Este é o compromiso que Telefónica asumiu este mércores nunha xuntanza en Santiago. De cumprise a promesa, máis de 3.000 aldeas poderían conectarse nos vindeiros doce meses. Isto supón un adianto respecto das previsións anteriores, que deixaban máis de 1.000 lugares para conectar durante 2008. Iso si, as conexións deste Programa son moito máis lentas e caras do que se pode contratar nas cidades. Continuar
ANÁLISE NO BLOGOMILLO
Que tarecos che gustan?
[25/01/2007 11:01] Un paraugas que prognostica se vai chover ou non, un quentador de bebidas con conexión USB ao computador, lentes con mp3, camisa con ventiladores... Cabeciñas de todo o planeta andan seguido a cavilar novas innovacións tecnolóxicas coas que sorprendernos e o debate e análise destes inventos é case un xénero en si mesmo dentro da bloguesfera. Sobre os famosos gadgets, que nós rebautizamos como "tarecos", Andrés Milleiro reflexiona que en Galiza está pendente algún espazo conxunto onde falarmos deles. Na súa bitácora propón crear un blog en galego sobre tarecos. Alguén se anima?
A INICIATIVA PARTE DE ASOCIACIÓNS DE FRANCIA, ALEMAÑA, NORUEGA E FINLANDIA
Consumidores europeos esíxenlle a Apple que faga compatíbel o iTunes
[24/01/2007 11:59] Catro das organizacións de consumidores máis importantes de Europa pediranlle a Apple que abra o seu sistema de venda de música pola rede iTunes-iPod para que sexa compatíbel con outras plataformas competidoras. A francesa UFC-Que Choisir, a federación de consumidores alemá VZBV e os mediadores de consumo de Noruega e de Finlandia uníronse nunha loita para conseguir que os arquivos vendidos na tenda de Apple se poidan reproducir noutros lectores, e non só nos seus iPod, como acontece na actualidade. Por iso, pídenlle á compañía que resolva o asunto antes de setembro do 2007. Continuar
O VÍDEO AMOSA DEVASTADORAS CONSECUENCIAS POR USAR SOFTWARE PIRATA
Microsoft alerta os usuarios sobre a pirataría
[24/01/2007 11:07] O xigante informático Microsoft está a poñer en marcha unha campaña contra a pirataría de software por medio de animacións cunha atractiva estética de banda deseñada. Dende este luns, o anuncio xa se pode ver na rede para os usuarios dos Estados Unidos, aínda que xa hai un mes que se lanzaron campañas semellantes en Indonesia, Suecia, Francia e Italia. No vídeo, titulado "Genuine Fact Files", preténdese advertir, e mesmo amedrentar, os usuarios e os empresarios sobre o perigo que pode supoñer empregar programas ilegais, e chega a insinuar unha relación entre "de balde" e "inseguro". Continuar
ESTRELLA GALICIA É PIONEIRA NO USO DOS POLÉMICOS RFID
A cervexa galega controlada cun microchip
[23/01/2007 16:28] Parecía ciencia-ficción pero xa está nos bares de Galiza. Os revolucionarios e polémicos microchips RFID entraron no país a través das billas de Estrella Galicia. A empresa cervexeira instalou milleiros destes diminutos trebellos para controlar o rendemento dos seus tiradores. A compañía pode saber así, por exemplo, canto tempo tarda un instalador en colocar unha nova billa. Esta eficaz tecnoloxía é tamén centro dunha gran polémica internacional. E é que o seu mal uso abre as portas para controlar os movementos das persoas e de todo o que compramos. Iso si, a ferramenta de Estrella é respetuosa coa privacidade dos donos dos bares e clientes. Continuar
OS INTERNAUTAS XA PODEN APOIAR INDIVIDUALMENTE A CAMPAÑA
Asina polo PuntoGal!
[23/01/2007 10:55] Ducias de institucións e colectivos garantíronlle xa o seu apoio á iniciativa da Asociación PuntoGal a prol dun dominio galego en internet. Agora chega a etapa da procura de apoios individuais. Na web do colectivo está aberto o espazo para asinar individualmente a proposta, "deixando constancia do apoio ás reivindicacións da Asociación PuntoGal". No momento de escribirmos estas liñas, un cento de persoas xa asinaron. O aval dos apoios sociais será clave para que á hora de levar a petición fronte á ICANN o desafío se resolva con éxito para Galiza.
- A Asociación PuntoGal presentouse na Real Academia
- A polo Galiza.gal: comeza a conquista do dominio
NOVAS ACCIÓNS DA XUNTA PARA FOMENTAR O USO DA REDE
Seis de cada dez mulleres nunca se conectaron a internet
[22/01/2007 17:56] Os pais dos alumnos das Galescolas xa non terán que desprazarse ao colexio para saber que tal lle vai aos seus fillos. Estes centros van contar cun portal no que os proxenitores poderán, entre outras cousas, saber que come o seu fillo cada día. O lanzamento desta web é unha das medidas que prepara a secretaria xeral de Igualdade, Carme Adán, para impulsar o uso das novas tecnoloxías entre as mulleres e as familias. Unhas iniciativas necesarias, pois o certo é que a fenda dixital en Galiza tamén é unha cuestión de xénero. Un exemplo é que máis de seis de cada dez varóns galegos conectáronse algunha a vez á rede. No caso das galegas, a proporción cae por debaixo do 40%, vinte puntos menos.
Continuar
FUNCIONARÁN BAIXO LINUX
Os primeiros computadores chineses venderanse a pouco máis de 150 euros
[22/01/2007 13:15] Oitenta usuarios están xa a probar os primeiros ordenadores desenvolvidos e creados integramente na China. A empresa Lemote anunciou que as probas no laboratorio do seu ordenador xa remataron e que a mediados de febreiro porán a venda as primeiras mil unidades. Trátase dun ordenador que funcionará baixo Linux e que terá 40 gigas de disco duro e 256 megas de memoria ram. A creación do chip Godson II E por parte de enxeñeiros chineses foi o paso final dun proxecto que contou co apoio e financiamento da Administración Pública China. Cun custo de pouco máis de 150 euros, a tecnoloxía chinés desembarcará tamén no resto do mundo co obxectivo de competir cos xigantes do desenvolvemento informático Microsoft e Intel. Continuar
UN VECIÑO DE COLES CONTA A SÚA ODISEA PARA ACCEDER Á REDE CON BANDA LARGA
En Galiza seguen a instalar liñas obsoletas para internet
[18/01/2007 16:34] O presidente Touriño prometeu que a banda larga chegaría ao 90% da poboación en tres anos. Pero o certo a día de hoxe é que Telefónica -destinataria da maioría dos cartos públicos para ampliar a cobertura de internet- segue a ofrecer novas liñas de teléfono vía radio, que impiden as conexións de banda larga. E isto non sucede unicamente en aldeas remotas. Pasou en Coles, a dez minutos de Ourense, no mes de decembro. Un veciño deste concello relata a súa odisea para conectarse a internet. E é que en Galiza, tres postes de teléfono poden ser un abismo. Continuar
ÉXITO DAS ENCICLOPEDIAS LIBRES
Seis anos de Wikipedia e case catro de Galipedia
[17/01/2007 11:24] Esta semana cúmprense seis anos da orixe da Wikipedia, un proxecto que estimulou profundamente o intercambio de coñecemento a través das novas tecnoloxías. Máis recente no camiño é a Galipedia, que fará o terceiro aniversario o próximo marzo. Ao fío, aproveitamos para falar con Miguel Bugallo, profesor de galego e ao tempo un dos máis activos colaboradores da enciclopedia libre galega. Continuar
A FORXA É UNHA INICIATIVA DE MANCOMUN.ORG
Nace o portal galego para a creación de programas libres
[17/01/2007 16:27] Axudar ao lanzamento de programas libres en galego é máis doado dende hoxe. Mancomun.org, a iniciativa galega polo Software Libre, acaba de crear A Forxa, un portal para coordinar o traballo de empresas, institucións e voluntarios. A través desta ferramenta pódese botar unha man na programación de novas ferramentas e tamén participar noutras tarefas menos técnicas, como a tradución de documentación ao galego. Continuar
EN PROBAS A PRIMEIRA VERSIÓN
Joost: A aposta dos creadores de Skype e Kazaa para a tv en internet
[17/01/2007 11:25] O que foi presentado inicialmente como Venice Project é rebautizado agora co nome de Joost. Trátase da proposta dos creadores das famosas ferramentas Skype e Kazaa para a consulta de vídeos en rede. Segundo aseguran, unha "combinación perfecta de televisión e internet". Poden solicitar xa as claves para probar a versión beta do trebello.
- Venice Project: nova e-promesa dos autores de Kazaa e Skpye
- Google paga 1.300 millóns de euros por Youtube
VILLARINO PRESENTARÁ A RENOVACIÓN TECNOLÓXICA DA CÁMARA NA CONFERENCIA DE PARLAMENTOS AUTONÓMICOS
O Parlamento dille si ao software libre
[16/01/2007 12:56] A presidenta do Parlamento de Galicia, Dolores Villarino, escolleu o software libre e as novas tecnoloxías como tema do seu relatorio na próxima Conferencia de Presidentes de Parlamentos Autonómicos (Coprepa). Nesta importante cita institucional, Villarino dará a coñecer un plan para fomentar o uso dos programas libres entre os deputados e traballadores da Cámara. Na actualidade, o Parlamento contrata a maioría das súas aplicacións a Microsoft, malia o apoio oficial da Xunta ao software libre. Continuar
UN GRUPO DE BOLSEIROS PROMOCIONARÁ INTERNET NO RURAL
Un cento de mozos loitarán contra a fenda dixital
[16/01/2007 16:54] Evitar que as aulas de formación tecnolóxica esmorezan por non existir persoal para sacarlles partido. Este é un dos fins da Rede de Dinamizadores da sociedade da información, unha iniciativa da Consellería de Industria para loitar contra a fenda dixital nas áreas rurais. A partir de hoxe, un cento de bolseiros pasarán a traballar en centros comarcais, concellos e asociacións para difundir as vantaxes do ciberespazo. Continuar
A IDEA PARTIU DA ESCOLA SUPERIOR DE ENXEÑARÍA INFORMÁTICA DE OURENSE
A Universidade de Vigo abre unha oficina en Second Life
[16/01/2007 13:23] A presenza galega en Second Life, o mundo virtual de máis éxito na rede, segue a medrar día a día. Se hai dous meses Nacho Mirás creaba o Centro Galego nesa realidade paralela, agora é a Universidade de Vigo a primeira institución académica do noso país en construír unha sucursal dixital. A idea partiu da Escola Superior de Enxeñaría Informática do campus de Ourense. Continuar
EXEMPLO DAS VANTAXES QUE O SOFTWARE LIBRE APORTA Á LINGUA
Un alumno lanza un tradutor galego-castelán para OpenOffice
[15/01/2007 16:17] Pasar documentos do galego ao castelán (e viceversa) é moito máis doado grazas a Óscar Hermida, un alumno do instituto Chan do Monte de Marín. Hermida acaba de publicar na rede Traducíndote, un programa capaz de traducir automaticamente textos a través de internet. A aplicación funciona completamente en liña, sen necesidade de instalar ningún programa no computador. Esta ferramenta, que explota a tecnoloxía creada no proxecto Opentrad, tamén traballa con arquivos de OpenOffice. Continuar
MORTOS REAIS CON TUMBAS VIRTUAIS
Varias webs homenaxean os usuarios de MySpace falecidos
[14/01/2007 15:46] Que internet é unha parte cada vez máis importante das nosas vidas non é nada novo. O que si que é noticia é que a morte e o respecto cara aos ausentes comece a protagonizar as chamadas webs 2.0. A práctica de converter a páxina do MySpace dun falecido nunha tumba virtual está comezando a ser máis que habitual nos Estados Unidos. Amigos e familiares seguen a deixar mensaxes nese espazo que antes utilizaban para comunicarse co finado. É por iso polo que xa aparecen os primeiros "cemiterios virtuais", páxinas onde se recollen as ligazóns ao Myspace dalgún finado, onde se explica o motivo da morte así como outros datos de interese sobre a persoa. Continuar
A FALTA DE FORMACIÓN É UNHA DAS CAUSAS DA FENDA DIXITAL DO AGRO GALEGO
Discapacitados introducen a mulleres do rural nas novas tecnoloxías
[12/01/2007 13:15] Mellorar a inserción laboral dun dos colectivos con máis problemas para atopar un traballo. Este é o motivo do innovador programa de alfabetización tecnolóxica para mulleres rurais da Confederación Galega de Minusválidos (COGAMI). Unhas 350 persoas, na súa maioría discapacitados, aprenden a explotar as ferramentas do ciberespazo a través desta pioneira iniciativa. Os cursos impártense en 30 vilas do rural galego por profesores que tamén sofren algún tipo de minusvalía. Continuar
KOOPA VENDE AS SÚAS CANCIÓNS A TRAVÉS DA REDE E MENSAXES DE MÓBIL
Un grupo musical británico entra nas listas de vendas sen editar discos
[12/01/2007 11:17] Non destacan pola súa orixinalidade, nin son grandes músicos, pero pasarán á historia por seren o primeiro grupo que entra nas listas de vendas do Reino Unido sen editaren discos. Koopa, banda de pop-punk do condado de Essex, está a piques de se converter na primeira en chegar ao top 40 sen ter contrato con ningunha discográfica. O seu single Blag, Steal & Borrow só se pode conseguir mediante descarga. Pero nun país cunha industria discográfica tan potente, non se leva moito o de ofrecer a música de balde. O tema pódese mercar con tarxeta de crédito (por 77 peniques, 1,15 euros) ou enviando unha mensaxe de texto que custa aproximadamente o dobre. Continuar
A DIRECTORA DE SOCIEDADE DA INFORMACIÓN DEBULLA AS CLAVES DO PEGSI
"O compromiso co software libre é real pero o cambio non é de hoxe para mañá"
[11/01/2007 17:40] Sobre os ombreiros de Elena Veiguela, directora xeral de Sociedade da Información, descansa a responsabilidade da estratexia da Xunta para sacar a Galiza da fenda dixital. Nesta entrevista, Veiguela reafirma a aposta do Goberno polo software libre, unha das medidas do novo Plano Galego da Sociedade da Información (PEGSI). O compromiso da Xunta cos programas abertos é "real" e compromete a todas as consellerías, argumenta a directora. Pero o asunto máis relevante do PEGSI é cando todos os galegos poderán ter internet de banda larga. Veiguela non concreta datas, pero defende que o proceso se acelerou grazas á presión sobre Madrid e Telefónica.
Continuar
BAILE DE DATAS SOBRE A EXTENSIÓN DA BANDA LARGA
A Xunta aproba o plan para salvar o país da fenda dixital
[10/01/2007 17:04] O Consello da Xunta aprobou o Plano Estratéxico Galego da Sociedade da Información (PEGSI) este mércores. Entre a choiva de promesas institucionais, destaca que o 90% dos galegos poderán acceder a banda larga dentro de tres anos. Malia todo, o Plano, que debería coordinar o traballo de todas as consellerías, só ten "carácter orientativo". Algunha das súas claves son o fomento dos contidos en galego e as axudas ás empresas tecnolóxicas. A previsión orzamentaria é elevada, oitocentos millóns de euros a gastar en catro anos no primeiro plano para sacar o país da periferia dixital. Continuar
NOVOS XEITOS DE EXPRESIÓN NA REDE
O Centro Sociocultural do Ensanche, en Compostela, dedica o sábado aos blogs
[11/01/2007 10:41] Os novos formatos de expresión e comunicación que están a aparecer co desenvolvemento da internet serán o fío condutor da xornada que organiza o sábado 13 o Centro Sociocultural do Ensanche, en Compostela. Durante a mañá e a tarde pasarán polas instalacións da rúa Frei Rosendo Salvado diversos conferenciantes que explicarán as características dos blogs, os fotologs, os podcasts e outros medios expresivos de recente creación e que están a crear unha ampla rede social tamén no noso país e na nosa lingua. Continuar
O TELÉFONO MÓBIL DE APPLE PRESENTADO O MARTES LEVANTA PAIXÓNS
O blogomillo amosa o seu entusiasmo polo iPhone
[10/01/2007 18:25] O novo e longamente agardado lanzamento de Apple, o iPhone, un artefacto que combina teléfono, navegador de internet, reprodutor de mp3 e a saber cantas cousas máis, está a causar sensación no blogomillo. Os blogs dos autores máis afeccionados á tecnoloxía, como Opaco, Blogue do Raul, Crónicas de Oz, Capítulo 0 e O neno Paquito ofrécennos completas revisións dun artigo que non chegará ás tendas galegas, no mellor dos casos, até finais de ano. Pero o seu deseño e características fan desexar a moitos a súa inmediata adquisición, a pesar de que o seu prezo (499 ou 599 dólares, segundo o modelo) e a limitación dalgunhas das súas prestacións esperten as críticas dalgúns blogueiros. O nivel de friquismo chegou até tales estremos que xa hai, por exemplo, un vídeo demostrativo con música de Las Grecas.
A XUNTA DESEÑA UNHA "PLATAFORMA DE CONTROL DE CONTIDOS" PARA AS TELEVISIÓNS DIXITAIS
As novas canles de TDT terán que emitir un 30% da programación na nosa lingua
[09/01/2007 17:50] Vixiar que as novas canles de Televisión Dixital Terrestre (TDT) cumpran a obriga de emitir un 30% do tempo, cando menos, en galego. Este é un dos obxectivos da nova "plataforma de control de contidos para as emisións" que prevé crear a Xunta. Un novo ente controlaría así a programación das empresas que gañaron a polémica adxudicación das 45 locais e as dúas para todo o país. A TDT ten unha especial relevancia no país debido aos problemas de recepción da sinal analóxica. Galiza xa é, xunto con Andalucía, a comunidade con máis audiencia nas primeiras emisións en TDT. Continuar
MÁIS DE 180 MUNICIPIOS RECIBIRÁN ESTAS AXUDAS
Innnovación e Industria destina 1,6 millóns de euros en achegar os concellos á rede
[06/10/2006 15:19] A Consellaría de Industria subvenciona a entrada e a presenza dos concellos na Sociedade da Información cun total de 1,6 millóns de euros que se repartirán de diferente maneira segundo a poboación coa que conte cada municipio. Esta medida impulsárona os datos de 2005 referidos ao acceso á rede, situada nun 31,25 por cento, segundo datos propios. Continuar
DEDICADO ÁS PÁXINAS DE TELEFONÍA MÓBIL
Xa está activo o dominio .mobi
[27/09/2006 11:55] Desde esta semana é posíbel rexistrar calquera web co sufixo .mobi, un dominio que a ICANN autorizou o mes de novembro do ano pasado e que desde xuño xa se podía empregar, aínda que só por marcas rexistradas. Continuar
PRESENTADO UN VIDEOXOGO PARA DESENVOLVER A CONCIENCIA AMBIENTAL ENTRE OS RAPACES
Apúntate á ecopanda e recicla!
[02/10/2006 13:53] As Consellerías de Educación e de Medio Ambiente, xunto coa empresa Ecoembes, lanzan esta semana o videoxogo interactivo 'Keco e a busca da ecopanda', destinado a que os rapaces adquiran conciencia ambiental aprendendo a reciclar. O xogo consiste en axudar a un robot a recoller e separar correctamente o lixo mentres se responden preguntas relacionadas co ambiente. Continuar
INSTALACIÓN PILOTO DA TECNOLOXÍA WIMAX NO CEAO
Unha rede para conectar Lugo
[02/10/2006 18:40] Lugo vai ser obxecto de unha experiencia piloto europea coa instalación de unha rede Wimax no polígono industrial do Ceao. Esta tecnoloxía consiste nunha rede de conexións inalámbricas de alta velocidade para transportar o sinal de internet. Comezará a funcionar en novembro, cando emprecen, tamén, a comercializarse estes servizos. Continuar
GUERRA PSICOLÓXICA ENTRE IRÁN E EEUU
A propaganda dispútase nos videoxogos
[03/10/2006 12:01] Farto de títulos como EEUU ataca Irán ou Asalto a Irán, un mozo iraniano de 27 anos contraataca presentando un videoxogo da súa autoría. Este pódese consultar no enderezo www.kobra.ir, aínda que só como aperitivo. A distribución comezará a facerse en Irán, aínda que si teñen pensado ampliala ao mundo occidental. E se os videoxogos estadounidenses tratan todos de atacar e destruir Irán, esta nova proposta contraataca cunha aventura que consite en evitar que un gran cargamento de petróleo atravese o Estreito de Hormuz e chegue aos EEUU. Inspirado en outro xogo chamado Counter Strike, mellórao tecnicamente. E chega en pleno debate sobre o armamento nuclear. Quen vencerá a guerra da propaganda?
CHEGARÁ A OUTRAS CIDADES GALEGAS NOS VINDEIROS DÍAS
O DNI electrónico entrou en Galiza por Ourense
[06/10/2006 11:12] O novo carné de identidade electrónico estreouse este xoves na comisaría de Ourense coa expedición de máis de 40 destas novas tarxetas que permiritán non só demostrar a nosa identidade diante dos funcionarios correspondentes senón tamén a través da rede, facendo posíbeis xestións administrativas, fiscais e comerciais. O retraso na implantación do novo carné está facendo medrar a ansia por renovar o documento xa no novo formato, polo que se prevén longas filas á hora de facer o trámite nos vindeiros días. O DNIE entrará pouco a pouco nas cidades galegas: o luns comezará en Lugo, en Pontevedra o 17 e en Vigo o 18. E, malia as campañas feitas por entidades como a Organización polo Multilingüísmo, teremos que seguir a ter o noso documento en español.
EVOLUCIÓN DA TV A TRAVÉS DE INTERNET
Venice Project: nova e-promesa dos autores de Kazaa e Skpye
[09/10/2006 13:44] "O Venice Project é unha nova empresa que combina os mellores elementos da experiencia televisiva coas máis poderosas tecnoloxías en internet, coa fin de redefinir a forma en que a xente pensa sobre a tv. Non é unha aplicación P2P nin un servizo de descarga". Velaí a pouca información que oficialmente facilitan deica agora os responsábeis desta iniciativa. Vindo de onde vén, cos creadores de Kazaa e Skype como padriños, o proxecto espertou gran expectación na rede. Continuar
O XIGANTE FAISE CON OUTRA EMPRESA EXITOSA
Google paga 1.300 millóns de euros por Youtube
[10/10/2006 08:55] Finalmente, o ruxerruxe converteuse en noticia confirmada nas últimas horas: Youtube pasa a formar parte de Google a cambio duns 1.300 millóns de euros. Google segue así axitando o escenario tecnolóxico, e cando non é coas novidades saídas dos seus propios laboratorios é a través da compra de e-proxectos para complementar o seu imperio internáutico. Con todo, a adquisición desta exitosa plataforma de publicación de vídeos de balde é a maior operación realizada deica agora, movemento estratéxico que Google realiza malia ter o seu propio servizo de intercambio de vídeos. Segundo anunciaron, de momento Youtube seguirá o seu funcionamento independente, aínda dependendendo en última instancia do xigante motor de busca.
- Anteriores: Venice Project: nova e-promesa dos autores de Kazaa e Skpye
- Youtube queda cos teus vídeos
- Xigantes empresariais apúntanse ás videotecas en liña
INICIATIVA AUDIOVISUAL EN LIÑA
eBlog Tv preséntase na rede con entrevista a Suso de Toro
[11/10/2006 10:58] En directo e desde Santiago de Compostela, "sen intermediarios nin xornalistas", o novo espazo en internet eBlogTV convida este mércores ás 12h aos internautas a teren unha conversa virtual co escritor Suso de Toro, a quen se lle poderán facer preguntas en tempo real. O acceso a este vídeo-chat é desta volta gratuíto, aínda que cavilan realizar encontros de pago en futuras emisións. A iniciativa chega promovida por Enrique Castro, promotor tamén da Rede de Blogs Socialistas. O próximo convidado, o mércores 18 de setembro, será Jordi Pedret, deputado do PSC no Congreso, quen falará sobre a campaña electoral catalá.
NOVAS FERRAMENTAS
Máis Google: cara ao Office en liña e atendendo aos Mac
[11/10/2006 11:47] O fluxo informativo do xigante informático estadounidense Google, non deixa de xerar novas alén do novo episodio en que a empresa tirou de talonario para mercar Youtube. Agora, por unha parte integran nun mesmo contorno Docs.Google.com as súas aplicacións en liña de procesador de textos e manexo de follas de cálculo e por outra xuntan media ducia das súas máis coñecidas ferramentas para uso dos computadores da mazá: Google Mac. Recomedámoslles tamén visita á bitácora oficial: Google Mac Blog.
A 'CÁPSULA DO TEMPO' DO PORTAL ESTADOUNIDENSE
Deixa pegada no espazo exterior con Yahoo
[11/10/2006 11:48] Como "primeiro proxecto electrónico antropolóxico da historia" cualificaron os responsábeis de Yahoo a súa última idea. A chamada Time Capsule pide a colaboración dos internautas para acumular información sobre o ser humano e a vida na Terra e aceptan propostas diversas: textos, vídeos, audio, música, que son ordenadas tematicamente: pasado, agora, beleza, fe... As achegas serán dixitalizadas e vanse facer dúas copias: unha vai quedar enterrada en Silicon Valley, á beira da propia sede da empresa, e non se abrirá até 2020, cando Yahoo cumpra 25 anos de historia. A outra vaise chimpar ao espazo a través dun sinal láser. A brincadeira tecnopublicitaria vai ir acompañada dun festivo cerimonial de tres días a celebrar na Pirámide do Sol de Teotihuacan, en México, o próximo 25 de outubro.
CONGRESO EN LIÑA DO OBSERVATORIO PARA A CIBERSOCIEDADE
Até 62 grupos de traballo xestionarán en novembro o ciberdebate sobre a e-sociedade
[11/10/2006 13:13] Política e cambio social, identidade e grupos sociais, comunicación e cultura, educación e aprendizaxes, crítica e innovación. Velaí os grandes temas arredor dos que se organiza a terceira edición do Congreso online do Observatorio para a Cibersociedade. No contorno deses eixos temáticos organízanse até 62 grupos de traballo especializados en moi diversas materias. Até o próximo 30 de outubro, os organizadores chaman ao envío de colaboracións e propostas de debate. Toda a información na web oficial do encontro, desta volta co lema: "Coñecemento aberto, sociedade libre".
EXPLICANDO AS FERRAMENTAS
Guía Google para mestres
[16/10/2006 12:27] Co curso xa iniciado, Google vén de presentar un espazo especialmente pesado para a difusión das súas aplicacións entre a comunidade escolar. A sección Google para Educadores presenta unha escolma guiada dos servizos máis importantes que ofrece de balde o xigante informático para a súa utilización por parte dos mestres en actividades a desenvolver polos seus alumnos co computador. Ao tempo, organizan a Google Teacher Academy, xornada de formación na propia sede da empresa á que convidarán a profesores estadounidenses a través dunha selección que inclúe a esixencia de elaboración dun vídeo dun minuto por parte dos docentes.
BANDA LARGA GRATUÍTA EN TODA A CIDADE DESDE 2007
Singapur súmase ao territorio wireless
[13/10/2006 14:28] A cidade estado de Singapur vaise sumar en xaneiro á pequena lista de paraísos para cibernautas nos que internet está no aire e usalo non se nota nos petos. O goberno da cidade vai poñer en marcha un plan, Wireless@SG, que levará internet con banda larga e sen cabos a cada curruncho de Singapur. Continuar
ESTABA EN DESACORDO CON ALGUNHAS DINÁMICAS DO PROXECTO
Un dos fundadores da Wikipedia vai crear unha nova e-enciclopedia
[13/10/2006 14:56] Un dos fundadores do proxecto Wikipedia, Larry Sanger, está a traballar nunha nova idea, Citizendium, que será unha nova compilación enciclopédica e cibernética con algúns aspectos, negativos a xuízo do autor, remediados. Sanger asegura que abandonou o proxecto da Wikipedia por estar desacordo coa súa metodoloxía e co seu funcionamento, debido a factores como a falta de un modelo académico, de dimensións estándar, de especialización dos autores, etc. Coa nova iniciativa pretende remendar estes erros e, empregando igualmente un sistema aberto e participativo, controlar en maior medida a calidade dos contidos. Polo momento está en fase experimental, e non conta cunha data marcada de presentación.
ORGANIZAN GALPÓN E AGNIX
A maior ciberfesta linuxeira, outra vez no Porriño
[13/10/2006 15:01] A maior party de software libre de Galiza comezou este xoves ás cinco da tarde e desenvolverase até o domingo 15 mediodía, con 150 ordenadores conectados en rede, conferencias, coloquios, visitas escolares, concursos e outras actividades relacionadas co Linux e os programas de código aberto. O evento está organizado por GALPón (Grupo de Amigos de Linux de Pontevedra), coa colaboración do Concello e de AGNIX (Asociación de Usuarios de GNIX). Continuar
A LENTA ATENCIÓN AOS CONSUMIDORES
"Por favor, agarde un intre": durmidos na poza das operadoras telefónicas
[16/10/2006 13:50] Contámoslles en ocasións anteriores de como as oficinas de atención aos consumidores se ven asolagadas de queixas de cidadáns polo mal servizo prestado por operadoras de servizos de telecomunicacións, coas que pode resultar unha odisea tratar de contactar telefonicamente para resolver un problema. No blog Tuexperto fanse eco dun caso acontecido en Estados Unidos que evidencia que o problema do défice na atención telefónica non é exclusivo dos clientes. No vídeo incluído vese como un técnico chega a un fogar para solucionar uns problemas coa conexión de banda larga, chama á sede da súa empresa de telecomunicacións, e agarda a que o atendan durante unha hora, quedando á fin durmido no sofá da vivenda mentres espera.
ELEMENTO NÚMERO 118
Confirmado o novo casilleiro para a táboa periódica: Ununoctio
[16/10/2006 13:50] A colaboración de dous laboratorios rusos e outro estadounidense vén de dar na creación oficial do Ununoctio, que fai suma de 118 elementos na Táboa Periódica. Resumindo proceso, seica a consecución deste elemento, o máis pesado dos coñecidos, produciuse facendo bater átomo | |
